Қазақстан Республикасының Ұлттық қауіпсіздік комитеті мен Сыртқы істер министрлігі бірлесе отырып, АҚШ және өзге де халықаралық серіктестердің қолдауымен, Сириядан бір топ қазақстандық азаматтарды елге қайтару операциясын өткізді деп хабарлайды Dalainform тілшісі.
Топ құрамында 4 ер адам, 1 әйел және 7 бала бар. Балалардың екеуі – жетім қалған. Ұлттық заңнамаға және халықаралық міндеттемелерге сәйкес, террористік іс-әрекетке қатысқан адамдар қылмыстық жауапкершілікке тартылмақ. Жетім балалар жақын туыстарының қамқорлығына беріліп, мемлекет тарапынан оларға барлық қажетті көмек көрсетілмек.
«Әйелдер мен балалар оңалту және қайта әлеуметтендіру бағдарламаларымен қамтамасыз етіледі», делінген дипломаттар таратқан деректе.
Қазақстан Президенті Қасым-Жомарт Тоқаев санкциялаған, террористік әрекеттер белсенді жүргізіліп жатқан аймақтардан азаматтарды қайтару іс-шарасы «Жусан» операциясының жалғасы болып саналады.
