2016 жылы Атырауда қазақ жерін сатуға және жалға беруге қарсы ұйымдастырылған наразылыққа қатысып, кейін түрмеге қамалған қоғам қайраткері Макс Боқаев 5 жылдан соң бостандыққа шықты деп хабарлайды Dalainform тілшісі.
Халыққа алғысын жеткізіп, анасын сағынғанын айтқан ол бірінші кезекте Исатай-Махамбет алаңына баратынын атап өтті. Араздықты қоздырып, жалған ақпарат таратты, митинг өткізу тәртібін бұзды деп айыпталған азаматтық белсендіні қарсы алу сәтін тіркелмеген Демократиялық партия жетекшісі Жанботал Мамай желідегі парақшасына жүктеп отырды.
Сонымен қатар, Макс Боқаев тыйым салынғанына қарамастан қоғамдық қызметпен айналыса беретінін мәлімдеп, барша Қазақстан өңірлерінде бейбіт ереуілдер өткізуге шақырды.
«Жұма сайын 28 ақпан, 7 наурыз, 14 наурыз, 21 наурыз және 28 наурыз митингке шығуды ұсынамын. Үкімет тыңдамаса, 3 сәуірден бастап алаңда шатыр тігеміз», – деген қайраткер Президент Қасым-Жомарт Тоқаевты Атырауда күтетініне назар аударды.
Еске сала кетсек, биыл, ауыл шаруашылығы жерлерін шетелдіктерге жалға және қазақстандықтарға жеке меншікке беруге енгізілген мораторий мерзімі аяқталады. Үкімет отырысында, ауылшаруашылық министрі Сапархан Омаров, осыған орай комиссия құру жұмысы басталып кеткенін баяндады.
