Айыпталушының аяғына тағылатын радио-электронды құрылғы жемқорлық қылмыстарға қатысты жұмыстарда қаржыны үнемдеуге мүмкіндік бермек. Бұл туралы аталған істі қолға ала бастаған Жемқорлыққа қарсы агенттік төрағасының цифрландыру мәселелері жөніндегі көмекшісі Аслан Құсайынов айтты деп хабарлайды Dalainform тілшісі.
Егер күдіктіге бірден түрмеге тоғытылмайтын болса, осы білезік-кісен көмекке келмек. Алғаш рет тиісті тәсіл сот шешімімен ағымдағы жылдың 17 қыркүйегінде үйқамаққа кесілген күдікті азаматқа қатысты қолданылған.
Қазіргі уақытта 500 мың теңгеден асатын сомаға жаңа құралдың 10 данасы сатып алынған және сәйкесінше қызметкерлердің жүріп-тұруына, ұялы телефонға жұмсалатын шығынның мөлшері азаяды делінуде.
Салмағы 80 граммдай білезікті тағардан бұрын айыпталушыға құқығы түсіндіріліп, денсаулығы тұрғысында медициналық тексеруден өткен.
«Құралды шешу немесе бүлдіру әрекеті байқалса, жүйе белсенді күйге еніп, диспетчерлік қосын мен жауапты мамандарға хабарлама түседі. Егер назардағы адамның білезікпен жүргенін растау қажет болса, ол 5 минут ішінде оны беті мен даусы арқылы айғақтауға міндетті», – дейді агенттік өкілі.
