Тәртіп сақшылары тұрғынды алдап, заңсыз жер сатқан алаяқты ұстады, деп хабарлайды DalaInform полицияға сілтеме жасап.
«Жергілікті тұрғын Сайрам АПБ-ға арызданып, алаяқ құрбаны болғанын жеткізді. Ер адамның айтуынша, танысы 2018 жылғы мамырда сегіз соттықтан үш жер учаскесін 4,5 миллионға бағалап сатқан. Алайда арада бір апта өткенде сатылған үш жер телімінің біреуінің құжаты дұрыс емес, ал екі жер учаскесі мүлдем басқа адамға тиесілі болып шыққан. Жәбірленуші ақшасын қайтаруды талап еткенмен, күдікті құжаттарын дұрыстап берем деп, уақыт созып жүрген. Аталған жайт сотқа дейінгі тергеп-тексерудің бірыңғай тізіміне енгізіліп, қылмыстық кодекстің 190-бабымен тіркеуге алынды. Сақшылар ақпарат алысымен қылмысты ашу мен алаяқты құрықтау мақсатында бірден іске кірісті. Күдіктіні анықтап, оны бөлімшеге жеткізді», – делінген polisia.kz мәліметінде.
Полицейлер алаяқтық әрекеттерді болдырмау үшін азаматтарға мұқият болуды және күмәнді қызметтер ұсынатын бейтаныс адамдарға сенбеуге кеңес береді. Сонымен қатар тез пайда табуға үміттеніп, өз мүлкі әрі ақшасын, сондай-ақ банктік есепшот кодтары мен басқа да жеке деректі белгісіз адамдарға бермеуді сұрайды.
