2020 жылғы 1 желтоқсанда, Қазақстанның тұңғыш президенті күні Түркістан қаласы әуежайының ұшу жолағына алғашқы ұшақ қонды, деп хабарлайды DalaInform индустрия және инфрақұрылымдық даму министрлігіне сілтеме жасап.
Түркістан мен Нұр-Сұлтан қалалары арасында қатынайтын алғашқы тұрақты рейсті отандық лоукост – «Fly Arystan» тасымалдаушысы орындады. Елорда-Түркістан бірінші рейсіне 168 әуе билеті сатылса (жүктеме 93%), кері бағытта – 161 (жүктеме 92%) сатылды.
Түркістан халықаралық әуежайы – толығымен жаңадан салынған еліміздің алғашқы әуежайы. Бірінші кезеңде қазақстандық «Fly Arystan», «Qazaq Air» және «SCAT» әуе компаниялары Түркістанды астана, Алматы қалаларымен, сосын еліміздің басқа облыс орталықтарымен күнделікті рейстермен байланыстырады. Алғашқы халықаралық бағыттар Ыстамбұл мен Дубайға ашылады деп жоспарланып жатыр. Әуе қатынасы және сала қалпына келген соң Мәскеу, Баку, Самарқанд пен басқа қалаларға рейстер ашылады.
«Шетел әуе компанияларын қолдап, ұшу географиясын кеңейту үшін Түркістан қаласының халықаралық әуежайы «ашық аспан» режимінде жұмыс істейді. Мақсат – шетелдік туристерді түркі әлемінің рухани орталығына көптеп тарту», – делінген ақпаратта.
Әуежайдың жалпы ауданы 905,3 га, жолаушылар терминалының аумағы – 10,5 мың м2, ұшу-қону жолағының көлемі – 3 300х45 м, өткізу қабілеті – сағатына 450 жолаушы.
