Жұманғарин бәсекелестікті қорғау және дамыту агенттігінің төрағасы болды, деп хабарлайды DalaInform тілшісі Ақордаға сілтеме жасап.
Серік Жұманғаринды ҚР бәсекелестікті қорғау және дамыту агенттігінің төрағасы қызметіне тағайындау туралы жарлық шықты.
«Жұманғарин Серік Мақашұлы Қазақстан Республикасының бәсекелестікті қорғау және дамыту агенттігінің төрағасы болып тағайындалсын», – делінген президент жарлығында.
Серік Мақашұлы Жұманғарин 1969 жылы 22 шілдеде Ақтөбеде туған. Мәскеу энергетикалық институтын, Бөкетов атындағы Қарағанды мемлекеттік университетін бітірген. Халықаралық бизнес академиясын «менеджмент» мамандығы бойынша тәмамдап, әскери әкімшілдендіру магистры атанған.
Еңбек жолын түрлі ұйымдарда бастап, әкімдік, агенттік, комитет, департаменттерде қызмет еткен.
2013 – 2014 жылдары – өңірлік даму министрінің орынбасары, вице-министр.
2014 – 2017 жылдары – ұлттық экономика министрлігі табиғи монополияларды реттеу және бәсекелестікті қорғау комитетінің төрағасы.
2017 – 2019 жылдары – ұлттық экономика вице-министрі.
2019 жылдың 21 мамырынан – Еуразиялық экономикалық комиссия алқасының мүшесі (министрі).
Айгүл ЕЛТАЙ
