Бір топ Сенат депутаты мен «СҚ-Фармация» компаниясының дәрі-дәрмек қоймаларын тексерді деп хабарлайды Dalainform тілшісі Жоғары палата сайтындағы ақпаратқа сүйеніп.
СҚ-Фармация қоймаларын аралау кезінде компанияның басқарма төрағасы Ерхат Есқалиев депутаттардың елімізде індет өршіген маусым, шілде айларында дәрі-дәрмектің жетіспеу себептері, осы бағыттағы проблемаларды шешу жолдары, ауруханаларға қажетті медициналық өнімдерді дер кезінде жеткізу, бағалар балансы туралы сұрақтарына жауап берді. Сондай-ақ, СК-Фармация короновирустың екінші ықтимал толқынына дайындығын көрсетті. Сенаторлар гуманитарлық жүктің аймақтарға жеткізілу мәселесі, ауруханаларда КВИ мен пневмония дертіне шалдыққандарды емдеуге арналған жабдықтардың түгелдігін сұрады.
Сенат депутаты Мұрат Бақтиярұлы пікірінше, СҚ-Фармация қоймаларын жалға алу үлкен бюджеттік шығындарға алып келеді.
«Қоймалардың көпшілігі, аймақтардағы дәрі сақтайтын орындар жалға алынады. Бұл өте көп қаражатты қажет етеді. Сондықтан артық шығынның алдын алу үшін «СҚ-Фармацияның» өз қоймалары болғаны дұрыс. Өйткені әкімшілік шығын үшін бір жылға 2 миллиард теңге деген өте көп», – дейді сенатор.
Жақында Үкімет басшысының атына жолдаған сауалында, аталмыш депутат емдеу орындарында 4 мың дәрігер-реаниматолог, рентгенолог, пульмонолог және осы секілді сала мамандарының тапшылығы қатты білінетініне қынжылды.
«Ірі орталықтардағы және өңірлердегі ауруханалар мен емханаларда 800-ден астам инфекционистің орны бос тұр. «Дипломмен – ауылға» бағдарламасымен 2018 жылы ауылдық жерлерге барған 706 (15%) жас маманның тек 355-іне ғана (50%) көтерме ақы төленген, 102 дәрігерге тұрғын үй бұйырды. Қазірде дәрігер кадрларымен қамтамасыз ету қалада 56,8% болса, ауылда бұл көрсеткіш 16,1% құрайды», – дейді ол.
Сонымен қатар, депутаттар жаңадан ашылған өкпені жасанды желдету стационарлық аппараттарын құрастыратын «Қазақстан Аселсан инжиниринг» кәсіпорнында болып, жаңа қондырғылардың сапасына алаңдаушылық танытты.
Нұр-Сұлтан қаласында орналасқан дәріханаларды аралау кезінде сенаторлар дәрі-дәрмек қорына, тұрғындарға көрсетілетін қызмет сапасына, карантин ережелерінің сақталуына ерекше назар аударып, келушілермен және медициналық қызметкерлермен сұхбат құрды.
