Мемлекет басшысына жоғарғы палатаның биылғы заң шығару қызметінің негізгі қорытындылары туралы ақпарат берілді, деп хабарлайды DalaInform Ақордаға сілтеме жасап.
Сенат спикері Қасым-Жомарт Тоқаевтың халыққа арнаған жолдауында айтылған мәселелерді іске асыруды қамтамасыз етуге бағытталған заңдардың қабылданғанына тоқталды. Атап айтқанда, жаңа «Экологиялық кодекс», «Техникалық реттеу туралы туралы» заң, «ҚР кейбір заңнамалық актілеріне президенттің «Жаңа жағдайдағы Қазақстан: іс-қимыл кезеңі» атты жолдауының жекелеген ережелерін іске асыру мәселесі бойынша өзгерістер мен толықтырулар енгізу туралы» заң қабылданды. Әшімбаев аталған құжаттардың бәрі еліміздің әлеуметтік-экономикалық дамуын, халқымыздың тұрмыс сапасын арттыруға бағытталғанын атап өтті.
«Тоқаев алдағы уақытта мемлекетімізде саяси жаңғыру және экономикалық даму бағдарламалары жалғасатынын, басқа салалар бойынша да ауқымды жұмыстар атқарылатынын айтып, сенатқа аталған бағыттарды заңмен қамтамасыз етуді тапсырды», – делінген мәліметте.
