Қазақстандық әйгілі әнші Димаш Құдайберген «Привет, Андрей!» бағдарламасына қатысты деп хабарлайды Dalainform тілшісі.
Онда ол композитор Игорь Крутойдың сүйемелдеуімен «Мен сені сағындым» әнін орындап берді.
Көрермендерге Димаштың ата-анасы Қанат және Света Айтбаевтардың мұрағаттағы ән шырқаған бейнежазбасы ұсынылып, ресейлік әнші Николай Басков қазақтың кең дауысына таңданысын жасырмады.
Димаштың өзі реті келіп тұрғанда кішкентай кезінен бағып-қағып, осындай дәрежеге жеткізген ата-әжесіне және әке-шешесіне алғыс айтты.
Осы орайда ресейлік тағы бір әнші Лолита бағдарламаның басты кейіпкерінен қазақша сөйлеуді өтініп сұрады.
«Баршаңызға амандық-саулық тілеймін. Барлық көрерменге, көршілес Ресей мемлекетіне Қазақстан деген елдің атынан жалынды сәлем айтамын», – деп ақжарма тілегін жолдады Димаш Құдайберген. Талант иесі қазақ тілінде «Қайырлы кеш, достар!» деп іліп әкеткен шоумен Александр Ревваға «Қазақстанда корпоративтерге қатысып жүргенін байқалады» деп әзілдеді.
