Тәртіп сақшылары бұзылған автобустың 39 жолаушысына көмектесті, деп хабарлайды DalaInform polisia.kz-ке сілтеме жасап.
Патрульдік полицейлер Қызылорда облысының аумағында ауа райының қолайсыздығына байланысты және жол қозғалысы қауіпсіздігін қамтамасыз ету мақсатында тәулік бойы күшейтілген режимде жұмыс істеп жатыр.
«28 желтоқсан күні Қызылорда-Павлодар тас жолының 140 шақырымында Нұр-Сұлтаннан Шымкентке бағыт алған автобус аяқ астынан бұзылып, жолда тоқтап қалды. Сол аумақта қызмет атқарып жүрген Қызылорда облысы полиция департаменті патрульдік полиция қызметкерлері Жандос Смайлов пен Қаршыға Тажбенов төтенше жағдайлар департаменті, «ҚазАвтоЖол» АҚ қызметкерлерімен бірігіп, бұзылған көлік жүргізушісіне әрі оның 39 жолаушысына көмекке келді. Сақшылар ТЖД өкілдерімен бірлесіп, бұзылған көлікті Қызылорда қаласына сүйреп жеткізді. Ал жолаушыларды басқа жеңіл автомобильдерді тоқтатып, Шымкентке қарай мінгізіп жіберді», – делінген ақпаратта.
Қызылорда облысының полиция департаменті ауа райы тұрақсыздығына байланысты жол қозғалысы қатысушыларына жол жүру кезінде мұқият болуды және шұғыл қызметтер хабарламаларына назар аударуды сұрайды. Жүргізушілерге көктайғақ кезінде жылдамдық режимін сақтап, күрделі маневрлер жасамай, көліктер арасындағы қашықтықты сақтау қажет. Көктайғақ күндері жаяу жүргіншілерге де, жүргізушілерге де қауіп төнеді. Сол себепті жолда абай болып, қарапайым қауіпсіздік ережелерін сақтаған жөн.
