Қазақстан Республикасының Сыртқы істер министрлігі Қырғыз Республикасындағы қазақстандық кәсіпорындардың жағдайына қатысты мәлімдеме жасады деп хабарлайды Dalainform тілшісі.
Онда, еліміздің сыртқы істер мекемесі, көрші мемлекеттегі қазақстандық инвесторларға тиесілі бірқатар кәсіпорындарға шабуылдар мен оларды басып алу әрекеттеріне байланысты үлкен алаңдаушылық білдірді.
«Кәсіпорындардың Қазақстан Республикасының азаматтары болып табылатын қызметкерлеріне күш жұмсау және осы кәсіпорындардың мүлкін жою туралы қауіп-қатер көрсету деректері ерекше алаңдатады. Қазақстандық компаниялар соңғы жылдары Қырғызстан экономикасына 1 млрд АҚШ долларынан астам инвестиция құйып, көрші елдің әлеуметтік-экономикалық дамуына елеулі үлес қосты», делінген хабарламада.
Құзырлы орын Қырғыз тарапын Қазақстан азаматтарының да, Қырғызстан аумағындағы қазақстандық компаниялардың да қауіпсіздігін қамтамасыз ету бойынша дереу шаралар қабылдауға шақырды.
Бұған дейін, Қырғызстандағы ахуалдың ушығуына байланысты, ондағы қазақстандық компаниялар тобына кіретін тау-кен кәсіпорнының жұмысын тоқтатқаны белгілі болды.
Осы орайда, Қырғызстан президенті Сауранбай Жиенбеков бүгін тағы мәлімдеме жасап, егер елдегі жағдай оңалып, заң жолына түсіп жатса қызметінен кетуге дайын екенін айтты.
