Шығыс Қазақстан облысының құтқарушылары жағада қалып қойған балаларға көмектесті деп хабарлайды Dalainform тілшісі.
Үлбі өзенінде 11-16 жастағы үш бала ата-ананың қарауынсыз қарсы жағада ойнап жүрген. Үйге қайтатын кезде олар өздігінен кері өте алмайтынын түсінген. Олардың ішіндегі ең ересегі суды кешіп өтіп, жақын маңдағы құтқарушылар бөлімшесіне хабар берген.
Оқиға орнына жедел жеткен ШҚО төтенше жағдай департаменті мамандандырылған жасағы мен жедел-құтқару жасағының құтқарушылары арнайы қайықпен балаларды бергі жағаға алып шықты. Тоңып қалған балаларды апаттар медицинасы орталығының дәрігерлері қарап шыққаннан соң, қатты тоңу белгілері болғандықтан ауруханаға жеткізілді.
Мамандар ата-аналарға балаларды қараусыз қалдырмай, қауіпсіздік шараларын түсіндіру қажеттігін ескертеді. Еш уақытта жағалауда және мұз ойықтарында ойнауға болмайды.
Төтенше жағдай туындаған жағдайда 112-ге қоңырау шалған жөн.
