«Қазатомөнеркәсіп» ұлттық атом компаниясы өзінің 100% еншілес кәсіпорны «Орталық» ӨК» ЖШС-тегі үлесінің 49%-на дейін қытайлық «CGNPC» компаниясына сатуға келісті деп хабарлайды Dalainform тілшісі.
Ол үшін қазақстандық тарап Қытайдан жылу бөлетін құрамалар жеткізу бойынша бірінші тапсырыс күтіп отыр.
Уағдаластық тарихына тоқталсақ, екі жақ Шығыс Қазақстан облысындағы Үлбі металлургия зауытының аумағында орналасқан, жобалық қуаты жылына 200 тонна уран металының эквивалентін құрайтын жылу бөлетін құрамалар (ЖБҚ) шығаратын зауыт салу жөнінде «Үлбі-ЖБҚ» бірлескен кәсіпорнын құрғаны белгілі болуда. Келісім «Үлбі-ЖБҚ» зауытынан 20 жыл ішінде ЖБҚ түрінде жылына 200 тонна уран металының баламасын (барлығы 4 000 тонна уран металының баламасын) сатып алуға қатысты «CGNPC URC» міндеттемесін көздеуде.
Ұлттық атом компаниясының «Орталық» ӨК» ЖШС-дегі 49% үлесін «CGNPC» немесе оның үлестес компаниясының пайдасына өткізу жөніндегі мәміле 2021 жылғы 30 маусымға дейін аяқталады деген болжам айтылуда. Мәміле аяқталғаннан кейін «Қазатомөнеркәсіп» өз үлесінің 51%-ын сақтап қалмақ.
«Бұл ретте серіктестер «Орталық» ӨК» ЖШС-тегі өзінің қатысу үлесіне барабар көлемде уран сатып алуды жүзеге асыратын болады», – дейді «Қазатомөнеркәсіп» ҰАК» АҚ баспасөз қызметінен.
“ОРТАЛЫҚ” өндіруші кәсіпорны” ЖШС – жарғылық капиталы 100 пайыз “Қазатомпром” ҰАК” қатысуымен серіктестіктің құрылымдық-құқықтық cипатында құрылған заңды тұлға. Түркістан облысы, Созақ ауданы, Қыземшек елдімекенінде тіркелген. “Орталық Мыңқұдық” кен орнында уранды өндіру, өңдеу және тау-кен жұмыстарын жүргізу қызметтерімен айналысады.
