2021 жылдың 19 ақпанындағы жағдай бойынша еліміздің 15 өңірінде дауылды ескерту жарияланды деп хабарлайды Dalainform тілшісі.
Ауа райы Нұр-Сұлтан, Шымкент қалалары мен Ақмола, Атырау, Алматы, Шығыс Қазақстан,Жамбыл, БҚО, Қарағанды, Қостанай, Павлодар, Қызылорда, Маңғыстау, СҚО, Түркістан облыстарында нашарлап тұр.
Төтенше жағдайлар министрлігінің ахуалдық орталығында республикалық жедел штаб құрылып отыр. Оның құрымында «Қазавтожол» ҰК АҚ, «Казахавтодор» ЖШС өкілдері және Ішкі істер министрлігінің қызметкері бар. Ақмола, СҚО, Қостанай облыстары және Нұр-Сұлтан қаласы төтенше жағдай департаменттерінде осындай штабтар жұмыс істеуде.
«Қазіргі уақытта ауа райының нашарлауына байланысты (боран, қар, жолды көрудің қиындауы, көктайғақ) еліміздің бес өңірінде, яғни Нұр-Сұлтан қаласы мен Алматы, Шығыс Қазақстан, Солтүстік Қазақстан, Павлодар облыстарындағы республикалық маңызы бар автожолдардың 8 учаскесі мен облыстық маңызы бар автожолдардың 40 учаскесінде қозғалыс жабылды», – дейді Төтенше жағдайлар министрлігінің ресми өкілі Талғат Уәли.
Шұғыл жұмыстарға жалпы ТЖМ, ІІМ, жол қызметтері мен жергілікті атқарушы органдардан 611 адам және 321 бірлік техника жұмылдырылған. Халықты эвакуациялау үшін жолдардың жабық учаскелерінде 284 жылыту пункті дайындалып, оларда 227 адам, оның ішінде 14 бала орналастырылған.
ТЖМ аумақтық бөлімшелері Ақмола, Алматы, Атырау, Қостанай, Павлодар облыстарындағы автожолдарда 77 адамды, оның ішінде 6 баланы қауіпсіз жерге апарғаны және 20 адамды, оның ішінде 3 баланы құтқарғаны мәлім болуда.
Осы орайда, «Қазгидромет» мамандары демалыс күндері елімізде күн суытатынын ескертуде. Түнде аяз күшейіп, тіпті оңтүстік аймақтарда да ауа температурасы төмендеуі мүмкін.