Кентау трансформатор зауытында бір уақытта 6 адамның жұмысын атқара алатын жапондық дәнекерлеуші робот іске қосылды деп хабарлайды Dalainform тілшісі Индустрия министрлігіне сілтеме жасап.
Дереккөзге жүгінсек, робот дәнекерлеу сапасын арттыруға және кәсіпорынның өнімділігін жоғарылатуға арналған.
Бір дәнекерлеуші маманның 8 сағатта атқаратын жұмысын жаңа техника 20 минут ішінде орындап шықпақ.
Тиісті қондырғы Жапонияда ойлап табылғанымен, Швецияда құрастырылып, Украина мемлекетінде арнайы өндіріске лайықты бағдарламасы енгізілген. Осы орайда, онымен жұмыс істеу үшін Кентаудағы зауыттан 3 маман Украина елінде арнайы іс-тәжірибеден өтіп келген.
«Болашақта зауытты тағы да осындай роботтармен толықтыру жоспарлануда. Айта кетерлігі, бұл дәнекерлеуші робот Қазақстанда іске қосылған ең алғашқысы болып отыр», делінген хабарламада.
