Бүгін Мәжіліс депутаттары «ҚР Дипломатиялық қызметі туралы» заңына өзгерістер мен толықтырулар енгізігуге келісті деп хабарлайды Dalainform тілшісі.
Онда Президент қол қойған соң «Дипломатиялық қызмет ардагері» ұғымы ресми түрде заң күшіне ие болмақ.
⠀
Бұл дегеніңіз, елшілер зейнетке шыққанда әлеуметтік қорғалуы жақсарып, зейнетақысына қоса ай сайын төлем алады деп күтілуде. Оның мөлшері сыртқы істер министрі орынбасарының жалақысының 20 пайызын, яғни 170 мың теңгедей соманы құрамақ. Алайда бұл төлем тек төтенше және өкілетті елші, халықаралық ұйымдар жанындағы тұрақты (өкілетті) өкіл қызметін атқарған немесе төтенше және өкілетті елші дипломатиялық дәрежесі бар дипломатиялық қызмет ардагерлеріне Қазақстан Республикасының Үкіметі айқындайтын тәртіппен және мөлшерде жасалмақ.
«Аталған санатқа зейнет жасына жеткен және жалпы еңбек өтілі кем дегенде 25 жыл, оның ішінде 15 жыл Қазақстанның дипломатиялық қызметінде болған тұлғалар жатады», – дейді ҚР сыртқы істер министрі Мұхтар Тілеуберді.
Министрдің сөзінше, бұл төлемге, бюджеттен 2021-2023 жылдар кезеңіне 183 млн 242 мың теңге бөліну қажет.
