Қазақстандағы жер қойнауын пайдаланушыларға арналған алғашқы онлайн-аукцион 61 млрд теңге түсім әкелді деп хабарлайды Dalainform тілшісі Энергетика министрлігінің ақпаратына сүйеніп.
Аталған бәссауда көмірсутектерді, яғни мұнай-газды барлау және өндіру құқығына арналды.
Жалпы алғанда, аукциондарда жеті учаске бойынша барлау және өндіру құқығы іске асырылды. Олар бойынша бастапқы баға 263 миллион теңгені құрады, ол нәтижесінде 230 есе артып, 61 миллиардқа дейін өсті. Бір учаске бойынша бастапқы құны 1000 есеге өсті.
Ең ұзақ сауда-саттық екі учаске – «Забурунье» және «Сарайшық» бойынша өтті. Таңғы 10:00-де басталып, кешке дейін жалғасқан аукцион нәтижесінде «Забурунье» учаскесіне барлау және өндіру құқығы 16,3 миллиард теңгеге сатылды, ол бойынша аукцион сағат 15:20-да аяқталды.
«Сарайшық» учаскесі бойынша аукцион ресми аяқталғанға дейін, яғни сағат 17:00-ге дейін жалғасты. Учаскедегі барлау және өндіру құқығының жалпы құны 43 млрд теңгені құрады. Бұл ретте, бастапқы бағасы 43 млн теңге болатын.
«Аукцион арқылы жерге меншік құқығы емес, жер қойнауын пайдалану құқығы берілетінін атап өту маңызды. Бұл құқық «Жер қойнауы және жер қойнауын пайдалану» кодексімен реттеледі, учаскелердегі кез-келген технологиялық процестер ҚР Энергетика министрлігі жанындағы Барлау және игеру жөніндегі орталық комиссияда қаралады», – делінген хабарламада.
Жер қойнауын пайдалану құқығын алған инвестор жергілікті атқарушы органмен жерді жалдау туралы шартқа қол қояды. Жобалау құжатын әзірлеу алдында әрбір жер қойнауын пайдаланушы жергілікті тұрғындардың қатысуымен қоғамдық тыңдаулар өткізуге міндетті.
Аукциондар онлайн режимінде және жасырын өтетіндіктен, қатысушылар бір-бірін көрмейді. Бұл ақпарат осы аукциондардың өткізілуіне жетекшілік ететін ҚР Энергетика министрлігінің мамандары үшін де қолжетімді емес.
Онлайн-аукцион қызметі 2020 жылдың 1 қыркүйегінде Мемлекеттік мүлік тізілімінің www.gosreestr.kz порталында іске қосылды, оның әзірлеушісі және иесі – «Ақпараттық-есептеу орталығы» АҚ.
Бүгін 82 учаске туралы ақпаратты қамтитын интерактивті карта бар. Объектілердің әрқайсысы бойынша аукционға бастамашылық жасау үшін әлеуетті инвесторға тек онлайн режимінде өтінім беру қажет, содан кейін кен орнын барлау және игеру құқығын аукционға шығару процесі басталады.
Аукционның барысын кез-келген адам бақылай алады. Оператор, яғни «Ақпараттық-есептеу орталығы» АҚ, Қазақстан Республикасы Энергетика министрлігінің тапсырысы бойынша жеке ашық аукцион залын құрды.
Аукционнан түскен барлық қаражат мемлекеттік бюджетті толтырмақ.
