Бүгіннен бастап, яғни 14 қазан Нұр-Сұлтан қаласында жаңа карантиндік шаралар күшіне енді деп хабарлайды Dalainform тілшісі.
Елорда әкімі Covid-19 індетін жұқтыру қаупінің жоғарылауы мен науқастардың санының артуына байланысты қалалық штаб отырысында бірқатар қосымша шектеулер қабылданғанын жазып отыр.
Біріншіден, жергілікті атқарушы орган қызметкерлері мен олардың квазимемлекеттік секторының кемінде 60%-ы қашықтан жұмыс тәртібіне ауыспақ. Адам көп жиналатын жеке ұйымдар жұмысшыларды осындай жұмыс уақытына ауыстыруы қажет. Індетті жұқтырудың негізгі ошақтары – ұжымдық (еңбек) ошақтар. Жұмыс орындарында санитария-эпидемиология нормаларының қатаң сақталуын бақылау керек.
«Екіншіден, кафе, дәмхана, бар, асхана және басқа да қоғамдық тамақтану нысандарының жұмыс уақыты 22 сағатқа дейін (9:00-ден 22:00-ге дейін) қысқартылады. Жұмыс күндері де, демалыс күндері де. Толтырылуы 30 орыннан артық емес», – деп атап өтті Алтай Көлгінов.
Нотариустардың, адвокаттық кеңселердің, бухгалтерлердің, консалтингтің, жылжымайтын мүлік агенттіктерінің, жарнама агенттіктерінің, сот орындаушыларының, туроператорлардың және тағы басқа сәйкес тараптардың жұмыс кестесі сағат 18-ге дейін (9:00-ден 18:00-ге дейін) болмақ.
Азық-түлік емес тауарлар мен заттарды сататын бутиктерге тек жұмыс күндері 18 сағатқа дейін жұмыс жасау рұқсат етіледі.
Монша, бассейн бар сауналардың жұмыс кестесі: жұмыс күндері 8:00-ден 21:00-ге дейін, сенбі және жексенбі күндері 9:00-ден 19: 00-ге дейін. Алдын ала жазылу міндетті.
«Жексенбіде қоғамдық көліктің жұмысы тоқтатылады. Автобустар дезинфекцияланады», – дейді қала басшысы.
Үшінші. Полиция департаменті санитарлық дәрігерлермен бірлесе күнделікті рейдтер жүргізіп, санитария нормаларын ұстану бойынша заңбұзушылық деректерін анықтау жұмысын күшейтпек.
Рейдтер көптеген нысандардың санитария-эпидемиология ережелерін қатаң сақтамай жатқандығын көрсеткен. Ұйымдар эпидемиялық талаптарды бірнеше рет бұзған деректер кездескен. Олардың қызметі дереу тоқтатылмақ.
