ҚР Еңбек және халықты әлеуметті қорғау министрлігі, 2020 жылы зейнетақы төлемдерін қоспағанда, егде жастағы азаматтарды әлеуметтік қолдаудың түрлі бағытына 32 миллиард 670 миллион теңгеден астам қаражат бөлінгенін мәлімдеді деп хабарлайды Dalainform тілшісі.
Қарттар күні аясында Нұр-Сұлтанда, сондай-ақ Ақмола, Ақтөбе, Атырау, Қарағанды, Маңғыстау, Павлодар, Солтүстік Қазақстан, Түркістан облыстарының жекелеген аудандарында 216,7 мың адамды қамтитын 2,3 млрд теңге көлемінде біржолғы қаржылай көмек көрсетілмек.
Жалпы, ағымдағы жылы, жергілікті бюджет мүмкіндіктерін ескере отырып және бизнестің әлеуметтік жауапкершілігі шеңберінде 15,2 млрд теңгеден астам қаражат бөлінген (оның ішінде жергілікті бюджеттен – 14,2 млрд теңге, тартылған қаражат есебінен – 1 млрд теңге):
– Ұлы Отан соғысындағы Жеңіс күніне бірреттік материалдық көмекке – 7,6 млрд теңге (123,6 мың адам);
– азық-түлік себетін беруге – 1 млрд 481,1 млн теңге (233,4 мың адам);
– жеңілдікпен дәрі-дәрмекпен қамтамасыз етуге – 174,2 млн теңге (40,8 мың адам);
– тісті протездеуге – 142,7 млн теңге (3 мың адам);
– шипажайлық емделуге – 1 млрд 362,3 млн теңге (19,5 мың адам);
– тұрғын үйді жөндеуге – 46,4 млн теңге (376 адам);
– отынмен қамтамасыз етуге – 136,1 млн теңге (3,7 мың адам);
– қоғамдық көлікте жеңілдікпен жүруге – 740,7 млн теңге (133,9 мың адам);
– көмектің басқа түрлеріне – 3 498,8 млн теңге (134,0 мың адам).
Бұдан бұрын хабарланғандай, бүгін, Қазақстанда Қарттар күніне орай айлық басталады. Аға ұрпақ өкілдеріне қамқорлық жасауға арналған іс-шаралар республиканың барлық аймақтарында өтпек. Олардың ішінде амбулаториялық-емханалық ұйымдарда «Ашық есік күндері» және «Жүректен жүрекке» қайырымдылық акциясы ұйымдастырылып, оның аясында ауыр науқас қарт адамдарға азық-түлік себеттері табысталады. Сонымен бірге еңбек ұжымдарында кездесулер және тағы басқа шаралар қолға алынады.
Еске сала кетсек, 2020 жылғы 1 қаңтардан бастап жыл сайынғы индекстеу нәтижесінде ынтымақты зейнетақы мөлшері 7%-ға өсті, базалық зейнетақының ұлғаюы 5%-ды құрады. Мемлекет басшысының тапсырмасын орындау мақсатында, ағымдағы жылдың 1 сәуірінен бастап тағайындалған зейнетақы мөлшері қосымша тағы 5% индекстелді. Бұл 2019 жылғы деңгеймен салыстырғанда базалық зейнетақының 10%-ға, ынтымақты зейнетақының 12% -ға өсуін қамтамасыз етті. Осылайша жиынтық зейнетақының ең төменгі мөлшері (ынтымақты+базалық) 58 мың теңгеден асады, ал жоғарғы шегі 128,5 мың теңгені құрайды. Сонымен қатар, азаматтар, БЖЗҚ-дан өздері жинақтаған қаражат есебінен зейнетақы төлемдерін алады.
