Индустрия және инфрақұрылымдық даму министрлігі Қырғызстанға гуманитарлық жүк жіберді, деп хабарлайды DalaInform ведомствоның баспасөз қызметіне сілтеме жасап.
«Қазақстан президенті Қасым-Жомарт Тоқаевтың тапсырмасы мен үкіметтің 2020 жылғы 13 қарашадағы №763 қаулысына сәйкес, индустрия және инфрақұрылымдық даму министрлігі 2020 жылғы 23 қарашада Қырғызстанға ауыр жүк көлігімен «Көкшетау-4П» өкпені жасанды желдету мобильді аппараттарының 400 данасы мен Қазақстан кәсіпорындарда өндірілген 2 миллион медициналық бетперде жіберді», – делінген министрлік мәліметінде.
Ақпаратқа сай, жіберілген гуманитарлық жүктің жалпы құны 400 миллион теңгеге жуықтайды. Атап айтқанда, «Тыныс» АҚ шығарған «Көкшетау-4П» өкпені жасанды желдету аппараттарының құны – 328 миллион теңге, «Dolce pharm» ЖШС және «Mega pharm» ЖШС шығарған медициналық маскалар құны – 61 миллион теңге.
