Біріккен Ұлттар Ұйымының штаб-пәтерінде Қазақстанның БҰҰ жанындағы тұрақты өкілі Қайрат Омаров өлім жазасын жоюға бағытталған азаматтық және саяси құқықтар туралы халықаралық пактіге екінші факультативтік хаттамаға қол қойды, деп хабарлайды DalaInform сыртқы істер министрлігіне сілтеме жасап.
Өлім жазасын жою туралы халықаралық хаттамаға қосылу туралы шешімді ел президенті Қасым-Жомарт Тоқаев БҰҰ бас ассамблеясының 75-ші мерейтойлық сессиясының жалпы саяси пікірталас барасында сөйлеген сөзінде жариялады. Ол Қазақстан өмір сүру мен адами қадір-қасиетке негізделген құқықты жүзеге асыруға бекем екенін атап өтті.
2019 жылдың желтоқсанында президент елдегі саяси реформаларды жүзеге асыру аясында сыртқы істер министрлігіне азаматтық және саяси құқықтар туралы халықаралық пактінің екінші факультативтік хаттамасына қосылу рәсімін бастауды тапсырды.
Бұл халықаралық құжатқа қол қою өлім жазасын қолдану аясын біртіндеп тарылту мен қылмыстық заңнаманы ізгілендіру бағытының жалғасы саналады. Қазақстан Республикасында өлім жазасын қолдану ел президентінің 2003 жылы тиісті мораторий енгізу туралы жарлығымен толығымен тоқтатылды.
