2020 жылдың басынан бастап Қазақстан халқы алған кредит мөлшері 7,36 трлн теңгеге дейін, 10,5%-ға ұлғайды деп хабарлайды Dalainform тілшісі.
Олардың құрылымында тұтынушылық қарыздар 4,3 трлн теңгеге, яғни 3,2%-ға көбейсе, мемлекеттік бағдарламаларды іске асыру есебінен берілген ипотекалық қарыздар 2,3 трлн теңгеге, 27,8%-ға пайызға өсті.
Бүгінгі Үкімет отырысында осылай деген Ұлттық банк төрағасы Ерболат Досаев, отандық алтын-валюта резерві, 2020 жылғы 31 желтоқсандағы алдын ала дерек бойынша 35,7 млрд АҚШ долларына жеткенін мәлімдеді. Алайда Ұлттық қор, дағдарысқа қарсы шараларды іске асыру аясында шығыстардың түсімдерден асып кетуіне және мұнай бағасының құлдырауына байланысты, бір жыл ішінде 3,1 млрд АҚШ долларына төмендеп кеткен.
«2020 жылғы желтоқсанда мұнай бағасының өсуі және экспорттаушылардың салық төлемдерін жүзеге асыру үшін шетел валютасын сатуы есебінен өскен ішкі ұсыныспен қатар тәуекелді активтерге сұраныстың артуы, теңгенің айырбастау бағамының бір АҚШ доллары үшін 425,07 теңгеден 420,91 теңгеге дейін, 1,0%-ға нығаюына мүмкіндік берді», – дейді Ұлттық банк басшысы.
Жалпы алғанда, 2020 жылы ұлттық валюта, дамушы елдердің басқа валюталары сияқты коронавирус салдарынан әлсіреген. Мәселен Бразилия реалы 29,0%-ға, түрік лирасы 25,0%-ға, ал Ресей рублі 19,3%-ға құлдыраса, былтыр теңгенің айырбастау бағамы бір АҚШ доллары үшін 382,60 теңгеден 420,91 теңгеге дейін, 10,0%-ға құнын жоғалтты.
11 қаңтарда теңге 0,4%-ға нығайып, бір АҚШ доллары үшін 419,18 теңгені межеледі.
