Мәжіліс депутаттары Қырғыз Республикасындағы парламенттік сайлауға байқаушы ретінде қатысты, деп хабарлайды DalaInform парламенттің төменгі палатасына сілтеме жасап.
Мәжіліс депутаттары биылғы 4 қазанда Қырғыз Республикасы Жогорку кенеші депутаттарының сайлауына байқаушы ретінде қатысты. Қазақстан тарапынан Тәуелсіз Мемлекеттер Достастығы парламентаралық ассамблеясының бақылаушылар миссиясының құрамында мәжілістің халықаралық істер, қорғаныс және қауіпсіздік комитетінің төрағасы Мұхтар Ерман қатысты.
Ал Мәжіліс депутаты Арман Қожахметов Ұжымдық қауіпсіздік туралы шарт ұйымы парламенттік ассамблеясының байқаушылар миссиясының бақылаушыларының қатарында болса, Дархан Мыңбай ТүркПА-ның байқаушылар тобына кірді.
Сапар барысында қазақстандық депутаттар парламентте, сайлау мен референдум өткізу жөніндегі орталық комиссияда, сондай-ақ Қырғызстандағы саяси партиялардың сайлауалды штабының өкілдерімен бірқатар екіжақты кездесулер өткізді.
Сонымен қатар 4 қазандағы сайлауда мәжілісмендер Бішкектегі сайлау учаскелерінде болып, ашылуына қатысты. Бұған қоса дауыс беру процесін, дауыстарды санауды және сайлау нәтижелерін шығару барысын бақылады.
