Отандық арнадағы бағдарламаға көмек сұрап келген көпбалалы мұқтаж анаға қазақстандықтар қысқа уақыт ішінде 10 миллион теңгеден астам қаржы жинап берді деп хабарлайды Dalainform тілшісі.
«Махамбет Өтемісұлы айтпақшы, «Жетімдерге жем берген, жесірлерге жер берген қазақ». Бабаларымыздан келе жатқан жақсы қасиеттің арқасында жетерлік қаражат жиналды. Істеген жақсылықтарыңыз Алладан қайтсын!», – деп жазды бағдарлама жүргізушісі Тахир Сұлтан.
Феруза Абдуллаеваның 5 баласы бар, күйеуі қайтыс болған. Жалғыз ана мемлекеттен алатын жәрдемақысын жеткізе алмай қиналған.
«Күйеуім көз жұмғалы үнемі қатыгездікке жолығып, жақсы адамдар қалмаған ба деп ойлап, үмітім азайып еді. Өмірім күрт өзгерді, қобалжып отырмын. Қазақ халқына рахмет», – деп көзіне жас алды кейіпкер.
Студияда оған көрермендер тарапынан бірнеше су жаңа қазіргі заманғы ұялы телефон сыйланып, сыртта балаларға сатып алынған киім-кешектің тосып тұрғаны айтылды. Жалпы бағдарлама эфирге шыққалы көмек қолын созғысы келіп хабарласқан, зәру отбасыны іздеген жандарда толас болмаған.
Жиналған сома қолға берілмейді, арнайы шотқа аударылып, баспана алуға және балалардың қажеттілігіне, болашақ игілігіне қарастырылады, есеп-қисабы жасалады деп жоспарлануда.
Посмотреть эту публикацию в Instagram
