Он екі елдің үміткері қатысып жатқан ән додасында Қарақат Башанова өнерін паш етті, деп хабарлайды DalaInform.
Пандемия халықаралық конкурс ережелеріне өзгеріс енгізіп, әр қатысушы өз елінің сахнасында өнер көрсетіп жатыр. Барлығы онлайн форматта өтуде.
Сайыста Қазақстан атынан 12 жастағы Қарақат Башанова бақ сынауда. Еліміздің үкілеген үміті Қарақат байқауда Forever әнін орындады.
Жас әнші туындыны осыдан бес жыл бұрын өмірден озған әкесіне арнады. Композицияны былтыр Ержан Максиммен бірге жұмыс істеген Хамит Шанғалиев жазған.
Дауыс беру кеше басталып, бүгінгі концертке дейін жалғасады. Концерттен кейін де 15 минут дауыс беруге рұқсат етіледі.
Дауыс беру Балалар Евровидениесінің ресми сайтында өтіп жатыр. Ал концертті Хабар телеарнасынан тікелей эфирде көруге болады.
