Нұр-Сұлтан қаласында болмай қалған тонау әрекеті бейнежазбаға түсіп қалды деп хабарлайды Dalainform тілшісі.
102 нөміріне қоңырау шалған айырбастау қосынының қызметкері, 39 жастағы әйел өзін белгісіз біреу пышақпен қорқытып ішке кірмек болғанын жеткізген.
«Осылайша, тексеріс барысында, сол жағалаудағы ғимаратта қызметкер келіншек есікті ашып жатқанда медициналық бетперде киген жас адамның кассадағы ақшаны алып кету пиғылымен шабуылдағаны анықталды», – дейді Нұр-Сұлтан полиция департаментінің баспасөз қызметінен.
Содан әйел қатты айғайлай отырып, қарсыласуға көшкен. Оған ұры қорқып, қашып кеткен.
Бүгінде полиция жедел іздестіру барысында елордада тәуліктік пәтер жалдаған Алматы қаласының 29 жастағы тұрғынын ұстады.
Айыпты қылмысқа әбден дайындалып, қас-қабағы мен сырт киімін, жүріс-тұрысын өзгерткен. Дегенмен тәртіп сақшылары оңтүстік астанаға қайта қашып үлгерген күдіктіні құрықтай білгенін мәлімдеуде.
Елорда полициясы шағын және орта бизнес өкілдеріне сақтық шараларына салғырт қарамай, күзет дабылын қоюды кеңес етуде.
