Түркіменстан президенті өз ұлын орынбасары етіп тағайындады деп хабарлайды Dalainform тілшісі.
Негізі Сердар Бердімұхамедов вице-премьер қызметіне кірісті. Осы орайда атап өтерлік жайт, Түркіменстан елінде мемлекет басшысы Үкіметке де тікелей жетекшілік етеді.
Жаңадан ашылған қызметте, президенттің перзентіне, барлық өндіріс саласында цифрлық жүйе мен инновациялық технологияларды енгізу міндеті жүктелуде. Сонымен қатар, жергілікті БАҚ дерегінше, Сердар, Жоғары бақылау палатасының төрағасы лауазымын иеленіп, Мемлекеттік қауіпсіздік кеңесінің құрамына енді.
Бұған дейін өнеркәсіп және құрылыс өндірісі министрі болған 39 жастағы кіші Бердімұхамедов, ресми құжатқа сай, мемлекет мүлкі мен қаржысына және Үкімет жұмысына бақылауды күшейтуі тиіс.
