Жоғалған малды бірнеше полицей экипажы іздеді, деп хабарлайды DalaInform pavlodarnews.kz-ке сілтеме жасап.
Облыстық полиция департаменті баспасөз қызметінің мәліметінше, 4 желтоқсанда Аққулы ауданының тәртіп сақшыларына шаруа қожалықтарының бірінің басшысы келіп, Қазы ауылынан он шақырым жерде орналасқан жайылымнан белгісіз біреулер 26 бас жылқысын ұрлап кеткенін айтқан. Ол бірнеше күн бойы жоғалған малды өз бетінше табуға тырысқан, бірақ таба алмаған соң полицейлерге жүгінген.
Аталған факт бойынша полицияның жеке құрамы мен ауданмен шекаралас өңірлерге бағдар берілді. Тәртіп сақшылары бірнеше мобильді топқа бөлініп, жақын маңдағы аумақтар және жайылымдарды мұқият аралап, шаруа қожалықтары әрі фермаларды тексеріп, куәгерлерден жауап алды. 20-ға жуық полицей төрт автокөлікпен жоғалған жануарларды іздеді.
«Іздеу шаралары нәтижесінде 6 желтоқсанда Қазы ауылынан 15 шақырым жерде орналасқан Бөрлі көлінен мұзға қатып қалған 26 өлген жылқы табылды», – деді аудандық полиция бөлімінің бастығы Тасқын Бодиев.
Тәртіп сақшылары ауыл тұрғындарына қырағы болуды және малды қараусыз қалдырмауды ескертеді.
