Өскемендік тәртіп сақшылары суға ағып бара жатқан ер адамды құтқарып қалды, деп хабарлайды DalaInform полицияға сілтеме жасап.
Биылғы жылғы 11 қаңтарда түнгі сағат 23.40-та Өскемен қаласы полиция басқармасының 102 арнасына белгісіз адамның Понтон көпірінен секірмекші болып тұрғаны жайлы қоңырау түсті. Шақырту түскен бойда оқиға орнына құрамында Мейірхан Рақышев пен Бауыржан Ризабеков бар Қыран-19 экипажы барды. Сол жерге келген сақшылар көпірдің қоршауын бір қолымен ұстап, өзенге секіргелі тұрған жігітті көрді. Тәртіп сақшылары оның қолынан ұстап қалуға тырысады, алайда сол кезде ер адам көпірден өзенге құлайды.
«Полицейлер судың ағыны адамды төмен қарай алып кеткендіктен, оны қараңғыда табуға тырысып, жағалау бойымен жүгіре бастайды. Жағалау бойымен шамамен 900 метр жүгірген сақшылар «көмектесіңдер, мен тоңдым» деген жігіттің даусын естіп, ойланбастан суға кіріп, құтқару арқанына байланған шеңберді лақтырды. Шеңберді ұстап үлгерген ер адамды судан жағалауға шығарып, оқиға орнына шақырылған жедел жәрдемге табыстады. Мән-жайды анықтау барысында 26 жастағы адамның мас болғаны және өз әрекеттерінің себебін түсіндіре алмағаны белгілі болды», – делінген polisia.kz ақпаратында.
