Нұр-Сұлтанда карантин тәртібін бұзушылар 184 миллион теңгеден астам айыппұл төледі деп хабарлайды Dalainform тілшісі қалалық ішкі саясат басқармасының ақпаратына сүйеніп.
«Елордада карантинді сақтау бойынша мобильді топтар жұмысы жалғасуда. Полиция қызметкерлері, еріктілер және санитарлық-эпидемиологиялық қадағалау өкілдері дүкендерді, сауда орталықтарын, мейрамханаларды және басқа да кәсіпкерлік субъектілерді тексереді. Жалпы алғанда, 5 шілде мен 21 желтоқсан аралығында мониторинг топтары шамамен 3 300 рейдтік іс-шара өткізді», делінген хабарламада.
21 желтоқсандағы жағдай бойынша Нұр-Сұлтан қаласының аудандық санитарлық-эпидемиологиялық қадағалау басқармалары полициядан карантинді бұзған адамдарға қатысты 2340 материал алған. 1185 жеке және заңды тұлға жалпы сомасы 230 891 244 теңгеге әкімшілік жауапкершілікке тартылса, бүгінгі таңда жалпы сомасы 184 081 225 теңгеге 957 әкімшілік айыппұл төленген.
Негізгі құқық бұзушыларға тамақтану орындары (мейрамханалар, демалыс орындары, банкет залдары), дүкендер, ойын-сауық мекемелері (караоке, түнгі клубтар), компьютерлік және ойын клубтары, сауда орталығындағы батут орталықтары және басқа да нысандар (кинотеатрлар, сұлулық салондары, сауналар, моншалар, массаж кабинеттері) жатады.
Еске сала кетейік, бірқатар түнгі клубтар мен мейрамханаларға қатысты бұйрықты орындамағаны үшін Нұр-Сұлтан қаласының мамандандырылған ауданаралық әкімшілік сотына 7 әкімшілік хаттама жіберілген. Олар – «SOVA» караоке-бары, «Жаным Сол» караоке-бары, «Alanya» түнгі клубы, «Teqila» демалыс бөлмесі, «Echo» бары, «Золото» мейрамханасы.
«Санитарлық эпидемиологиялық қадағалау басқармасының өкілдері соттан жоғарыда аталған нысандар қызметін 3 айға дейін тоқтата тұру түріндегі қосымша жазаны қолдану туралы өтініш жасайды», – дейді санитарлық-эпидемиологиялық қадағалау департаментінің өкілдері.
