Қазақстан азаматтарын алғашқы медициналық-санитарлық көмек (АМСК) көрсететін медициналық ұйымдарға өз еркімен тіркеу науқаны 15 қыркүйектен 15 қарашаға дейін жалғасады, деп хабарлайды DalaInform тілшісі қалалық денсаулық сақтау басқармасына сілтеме жасап.
Акцияға барлық №1-15 қалалық емхана, медициналық көмектің кепілдендірілген көлемі мен міндетті әлеуметтік медициналық сақтандыру шеңберінде көмек көрсететін жеке медициналық ұйымдар қатысады.
«АМСК көрсету ұйымдарына тіркеу науқанын бастадық. Өз кезегінде, азаматтарға қызмет көрсетудің аумақтық принципін ескеріп, үйде медициналық көмек алу үшін тұрғылықты мекен-жайыңызға жақын орналасқан емханаларды таңдауға кеңес береміз», – деді денсаулық сақтау басқармасы басшысының орынбасары Әлия Рүстемова.
Қазір қаладағы АМСК ұйымдарына 1 миллион 181 мыңнан астам адам тіркелген.
Тұлғаны АМСК ұйымдарына тіркеу амбулаториялық деңгейде медициналық көмек көрсету үшін негіз болып табылады және келесі принциптер бойынша жүзеге асады:
1) аумақтық қолжетімділік;
2) АМСК ұйымын еркін таңдау;
3) АМСК дәрігерін (жалпы тәжірибе дәрігері, учаскелік терапевт, учаскелік педиатр) еркін таңдау;
4) отбасылық қызмет;
5) меншік формасына, ведомстволық бағыныстылығына қарамастан АМСК ұйымдарының теңдігі әрі әділ бәсекелестігі.
18 жасқа толмаған тұлғаларды тіркеуге оның заңды өкілдерінің біреуі құқылы.
Азаматтарды АМСК ұйымдарына тіркеу олардың сұранысы бойынша «Электрондық үкімет» веб-порталы арқылы жүзеге асады. Тіркеу кезінде оған дейін тіркелген ұйымнан автоматты түрде шығады.
Емханаға өз еркімен тіркеу құқығы жылына бір рет қана беріледі.
Айгүл ЕЛТАЙ
