Қызылорда облысында мұнай өнімдерін заңсыз тасымалдаған тұрғын ұсталды, деп хабарлайды DalaInform polisia.kz-ке сілтеме жасап.
«Қызылорда облысы Сырдария аудандық полиция бөлімінің учаскелік инспекторы 27 желтоқсан күні сағат 02:35 шамасында Қызылорда-Құмкөл тас жолының 107 шақырымында Қызылорда қаласының 23 жастағы тұрғыны жүргізіп келе жатқан Ланд Крузер автокөлігін тоқтатқан. Жүргізуші құжаттарын тексеру барысында көлік жүк салғышынан еш құжаты жоқ, арнайы ыдысқа құйылған 500 литр мұнай өнімі табылған. Тиісті сараптамалар тағайындалды», – делінген ақпаратта.
Аталған дерек бойынша қылмыстық кодекстің 197-бабы, 1-бөлігі (мұнай және мұнай өнiмдерiн шығару заңдылығын растайтын құжаттарсыз оларды тасымалдау, иемдену, өткiзу, сақтау, сондай-ақ мұнайды қайта өңдеу) бойынша тергеп-тексеру амалдары жүріп жатыр.
