Бүгінде мұнай бағасы өткен жылдың қаңтар айынан бастап алғаш рет барреліне 65 доллардан асты деп хабарлайды Dalainform тілшісі.
Лондон биржасындағы сауда нәтижесі осындай көрсеткішті межелеп отыр. Тіпті, АҚШ энергетика министрлігінің болжамынша, оның құны 2050 жылға қарай 173 долларға шарықтауы немесе жағымсыз жайттар салдарынан 48 долларға төмен құлдилауы мүмкін.
Жалпы «Brent» мұнайы жыл басынан бері қымбаттап келеді.
Осы орайда, Қазақстанның ОПЕК+ шеңберінде міндеттемелердің орындалуы бойынша шаралар қабылдауға әзір екені мәлімделуде. Себебі, өндірісті қысқарту арқасында әлемдік мұнай нарығындағы оң үрдістер аңғарылуда.
2021 жылы дүниежүзілік экономиканың өсуі 4,4% болған деңгейінде, мұнайға сұраныс тәулігіне 95,9 млн баррельді құрайды деп күтілуде (2020 жылмен салыстырғанда өсім тәулігіне 5,6 млн баррель).
Ал теңге бағамы, ҚР Ұлттық банк төрағасы Ерболат Досаев айтқандай, 15 ақпанда бір АҚШ доллары үшін 416,92 теңге болып, 1,7 пайызға нығайды. Бірақ, оның сөзінше, мұнай бағасы өскенімен, АҚШ долларының күшеюі себебінен дамушы елдер валюталарының әлсіреуі де орын алған. Мысалға, қаңтарда, Бразилия реалы 5,4, Мексика песосы – 3,3, Оңтүстік Африка ранды мен Ресей рублі 3,2 пайыз әлсіреген.
