ҚР Президенті Қасым-Жомарт Тоқаев Алатау баурайындағы резиденциясында Ұлттық ғылым академиясының жетекшісі Мұрат Жұрыновпен кездесіп, Ұлттық қоғамдық сенім кеңесінің мүшелері Қайрат Жолдыбайұлы мен Андрей Чеботаревті қабылдады деп хабарлайды Dalainform тілшісі.
Мемлекет басшысы ғылым академиясының басшысымен әңгімесінде ғылым ел экономикасына қызмет етуге тиіс екеніне ерекше назар аударды. Оның пікірінше, ғалымдар мен бизнес өкілдерінің тығыз ықпалдастығы инновацияларды енгізіп, экономикалық өсімді қамтамасыз ету үшін жаңа мүмкіндіктерге жол ашады.
Қасым-Жомарт Тоқаевтың қоғам қайраткері Қайрат Жолдыбайұлымен сұхбатында демографиялық саясат, өскелең ұрпақтың рухани-адамгершілік тәрбиесі және отандық балалар әдебиетін дамыту мәселелері талқыланды.
«Альтернатива» өзекті зерттеулер орталығының директоры Андрей Чеботарев Президенттің Қазақстан халқына арнаған жолдауында айтылған бастамаларына қолдау білдірді. Ақорданың хабарлауынша, ол, ауыл әкімдерінің тікелей сайлауын өткізудің маңыздылығы еліміздің саяси трансформация үдерісіндегі тағы бір оң қадам екенін айтты.
Сонымен қатар кездесуде жергілікті өзін-өзі басқару ісін одан әрі дамыту, мемлекеттік стратегиялық жоспарлау жүйесін жақсарту, мүлік меншіктерінің бірлестігін құру және оның қызметі жөніндегі ұсыныстар қарастырылды.
