Ағымдағы жылғы 1 желтоқсандағы жағдай бойынша атаулы әлеуметтік көмек (АӘК) 168,6 мың отбасының 858,2 адамына 58,3 млрд теңге сомасында төленді деп хабарлайды Dalainform тілшісі ҚР Еңбек және халықты әлеуметтік қорғау министрлігінің дерегіне сүйеніп.
АӘК отбасының әрбір мүшесіне жан басына шаққандағы орташа табысы өңірлік ең төменгі күнкөріс деңгейінің 70%-ынан төмен азаматтарға тағайындалмақ.
«Бұдан басқа, АӘК көрсетудің жаңа тетігін іске асыру шеңберінде еліміздің барлық өңірлерінде табысы аз отбасылардың мектеп жасына дейінгі балаларын кепілдік берілген әлеуметтік топтамамен қамтамасыз ету бойынша жұмыс жүргізілуде», – дейді министрлік өкілдері.
Ағымдағы жылдың 11 айында әлеуметтік топтама алушылардың жалпы саны 158,1 мың отбасын немесе 431,3 мың адамды құраған.
1 жастан 6 жасқа дейінгі АӘК алушылар қатарынан 216,4 мың бала азық-түлік жиынтығы және тұрмыстық химия түрінде кепілдік берілген әлеуметтік топтама алған.
Естеріңізге сала кетейік, 130 мың қазақстандық отбасының 650 мыңнан астам адамына IV тоқсанда атаулы әлеуметтік көмек тағайындау мемлекеттік инстанцияға жүгінбей-ақ автоматты түрде ұзартылды. ҚР Еңбек және халықты әлеуметтік қорғау министрінің тиісті бұйрығы ағымдағы жылдың 25 қыркүйегінде қабылданды.
АӘК алушыларға бұдан бұрын, II және III тоқсандарда да төтенше жағдай тәртібі мен карантиндік шектеу шараларының қолданылуына байланысты көмек тағайындау ұзартылған болатын.
