Атырауда итті машинасының артына байлап, көше бойы асфальтпен аяусыз сүйреткен ер адамға қатысты қылмыстық іс қозғалды деп хабарлайды Dalainform тілшісі.
Сорақы жағдайды белгісіз біреулер көрмегенде, жағдайдың қалай боларын кім білсін?!
«Не істеп жатырсыз? Масқара, бұныңыз не?», – деп айғайлаған көрші көліктің руліндегі куәгер дереу араша түсуге тырысады.
Қаскөй болса, тоқтап, итті жүксалғышқа тиеп, кетіп қалады.
Оны мемлекеттік нөмірі арқылы іздестіріп, ұстаған полиция «Жануарларға қатыгездік жасау» бабы бойынша тергеу жұмыстарын бастады. Ал атыраулық тұрғын тәртіп сақшыларына оғаш іс-қимылын есік ашылып қалып, иттің жерге құлап түсуімен түсіндірген.
Адамның сенімді серігі саналатын, әбден қорқып, азап шеккен шалажансар жануар бүгінде мал дәрігерлерінің қарауында, бірнеше жерінің терісі сыпырылып қалған.
Еске сала кетсек, бұған дейін Екібастұз қаласында да осылай итті машинаға байлап сүйреткен адам қоғам наразылығын тудырды. Осы Атырауда ит тоңазытқыш есігінде буындырылып, кейін қорлық көрген төрт аяқты мақұлықты америкалық отбасы асырап алды.
