Ақтөбе өңіріндегі кен орнында жарылыс болып, 4 адам қаза тапты деп хабарлайды Dalainform тілшісі.
Облыстық әкімдіктіктің мәліметінше, 30 желтоқсанда 21 сағат 21 минутта (Ақтөбе уақыты бойынша) Хромтау ауданының өрт сөндіру бөлімінің пультіне Көктау кентінен 30 шақырым жерде орналасқан «Ақтөбе мыс компаниясы» ЖШС «Весенняя Аралчинская» шахтасында жарылыс жұмыстарын жүргізу кезінде төрт жарушының қаза болғаны туралы хабарлама келіп түскен.
«Оқиға орнында барлау жүргізу кезінде 1 зардап шегуші және 4 адам қаза тапқаны анықталды. Қазіргі уақытта зардап шегушіні медициналық қызмет қызметкерлері тексеріп жатыр, оқиғаның себебі анықталуда. Оқиға орнына жедел түрде облыс әкімі Оңдасын Оразалиннің тапсырмасы бойынша мән-жайды анықтау үшін облыс әкімінің орынбасары С.Бекбергенов және ТЖД қызметкерлері шықты», делінген хабарламада.
Ал жергілікті журналист Жаңалық Ахаш желідегі өз парақшасында, аталған ресейлік мыс компаниясына қарасты кен орнындағы қайғылы жағдайға қарамастан өндірістің тоқтамағанын, марқұмдардың сүйегі әлі сыртқа шығарылмағанын жазып отыр.
Бейресми дерек бойынша, оқыс оқиғадан тау-кен маманы Асхат Қайқанов, жарылыс жұмыстарын жасаушылар Рустам Саматов және Денис Черный, жүргізуші Берік Жақыпов қайтыс болған.
«Русская медная компания» сайтында «Ақтөбе мыс компаниясының» басшысы Наталья Бондаренко екені, кәсіпорын құрамына жылына 5 млн тонна кен өңдей алатын тау-кен байыту комбинаты және екі кен орны кіретіні, Қазақстандағы жұмыс ауқымын одан әрі кеңейткісі келіп отырғандары жазылған.