Солтүстік Корея билігі коронавирусқа қатысты енгізілген шектеу шараларын бұзған азаматты жария түрде ату жазасына кесті деп хабарлайды Dalainform тілшісі ресейлік басылым дерегіне сүйеніп.
Қытаймен шекарадағы солтүстіккореялық өлке тұрғының айтуынша, қараша айының соңынан бастап, орталық партия комитеті төтенше жағдайды күшейте түскен. Сондықтан, көрші елмен байланысты тыю мақсатында және шекара маңы халқына үлгі болу үшін, жаза көпшілікке ашық орындалды. Оның үстіне контрабанда жағдайы жиілеген.
«Өлім жазасына кесілген ер азаматтың жасы шамамен 50-де, 2020 жылдың көп бөлігінде жабық тұрған шекара арқылы қытайлық серіктестерімен заңсыз қарым-қатынас жасаған», делінген ақпаратта.
Пандемия кезінде қос елдің сауда-саттығы 75 пайызға төмендеп кетті. Осы орайда, Солтүстік Корея басшылығы, қарақшылық тасымал салдарынан шетелден ауру кіреді деген қауіппен әскери күзетті нығайтуда.