Қосшы ауылындағы ірі өртті екі өңірдің өрт сөндірушілері сөндірді деп хабарлайды Dalainform тілшісі Төтенше жағдайлар министрлігінің ақпаратына сүйене отырып.
2020 жылғы 28 желтоқсанда сағат 00.22-де Целиноград ауданының Ақмол ауылы №22 өрт сөндіру бөлімінің байланыс пунктіне Ақмола облысы, Целиноград ауданының Қосшы ауылында қазандық жанып жатқаны туралы хабарлама келіп түскен.
Сағат 00: 23-те оқиға орнына жақын маңдағы Қабанбай батыр ауылындағы Ақмола облысы ТЖД №34 өрт сөндіру бекетінің өрт сөндіру автоцистернасы (арақашықтығы 18 шақырым) және Ақмол ауылындағы №22 өрт сөндіру бөлімінің өрт сөндіру автоцистернасы (арақашықтығы 45 шақырым) жіберілген.
Оқиға орнына қосымша Нұр-Сұлтан қаласы ТЖД күштері мен құралдары (арақашықтығы 18 шақырым) жолданған.
«Бірінші бөлімше шақыру орнына келген кезде сағат 00.50-де (27 минуттан кейін) жалпы алаңы 750 шаршы метр қазандық пен металл пластик және жиһаз бұйымдарын өндіретін цехтың толықтай отқа оранғаны анықталды», – дейді Төтенше жағдайлар министрлігінің ресми өкілі Талғат Уәли.
Өрт сөндірушілер көршілес жатақхана мен отбасылық-дәрігерлік амбулатория ғимараттарын сақтап қалды.
Өртті сөндіруге және Нұр-Сұлтан қаласы және Ақмола облысы ТЖД өртке қарсы қызметінің 34 қызметкері мен 5 өрт сөндіру автоцистернасы жұмылдырылған.
Өрт сағат 02.35-те ауыздықталып, сағат 04.20-да сөндірілген. Қаза болғандар мен зардап шеккендер жоқ. Тілсіз жаудың тұтану себебі анықталуда.
