Алматы облысының тәртіп сақшылары аса ірі көлемдегі мал ұрлығын ашты деп хабарлайды Dalainform тілшісі салалық сайтқа сілтеме жасап.
9 қазанда Жамбыл ауданы полиция бөліміне Кеңсай ауылының 76 жастағы тұрғыны 2 қазаннан 3 қазанға қараған түні жайылымнан 17 бас жылқысының ұрланғаны туралы арызданған.
Келтірілген шығынның жалпы сомасы 12 млн теңгеден астам.
Аталған дерек ҚР Қылмыстық кодексінің «Мал ұрлау» бөлігі бойынша тіркелді.
«Бірлескен қарқынды жедел-іздестіру іс-шаралары барысында Тараз қаласының мал базарынан жәбірленуші таныған ұрланған 11 бас жылқы табылып, тәркіленді. Жоғалған малды әрі қарай іздеу жұмыстарын жалғастыру кезінде Түркістан облысы Сайрам ауданының Арыс ауылынан жәбірленуші таныған тағы екі жылқы табылып, тәркіленді. Алыпсатарлар анықталып, олар арқылы тағы екі құлын мен бір бие Тараз қаласындағы жеке тұлғалардан табылды», – деп тарқатады Жамбыл аудандық полициясының басшысы Асхат Тегенбаев.
Іздестірудің екінші күнінде полиция қызметкерлері осы қылмысқа қатысы бар деген күдікпен Жамбыл ауданының Қарақастек ауылында тұратын, Қытай Халық Республикасының 37 жастағы тумасын ұстайды. Ол, өз кезегінде, осы қылмысты жасағанын мойындады.
Бүгінде барлық мал заңды иесіне қайтарылып отыр. Ақсақалдың ұлы алғысын айтуда.
