Талдықорған қалалық мешітінің діни қызметкері тәртіп сақшыларына хабарласып, ыдысқа отырғызылған гүлді белгісіз біреулердің үптеп кеткенін айтқан. Бұл туралы DalaInform тілшісі Polisia.kz сайтына сілтеме жасап хабарлайды.
«Оқиға орнына келген жедел уәкілдер қажетті бастапқы тергеу әрекеттерін жүргізіп, бақылау камераларының бейнежазбаларын зерделеген. Жедел топ құрамында болған Талдықорғанның учаскелік полиция инспекторы Ильяс Фурманұлы қызмет көрсетілетін учаскесін жақсы меңгергенін дәлелдеді. Ол қаладағы шағын аудандардың бірінде тұратын 43 жастағы әйелдің мекенжайын жылдам анықтап, ұстады. Күдіктіден тәркіленген гүлдер мешітке қайтарылды», – делінген ақпаратта.
Ұрлыққа барған әйелдің айтуынша, ол гүлдерді қатты жақсы көреді екен. Ол қызыққаннан ыдысқа отырғызылған өсімдікті үптеп кетіпті. Тексеру барысында күдіктінің бұған дейінгі заңға қайшы әрекеті анықталған жоқ. Аталған дерек бойынша қылмыстық кодекстің 187-бабы, 1-бөлігі бойынша қылмыстық іс қозғалды.
Айгүл ЕЛТАЙ
