1-5 сынып оқушылары «кезекші сынып» режимінде білімін жалғастырады, деп хабарлайды DalaInform әкімдікке сілтеме жасап.
Ведомствоаралық комиссия шешімімен оқу орындарының жұмысына өзгертулер енгізілді.
«Үшінші тоқсанда бітіруші сыныптар (9, 11, 12 сыныптар) кезекші сабақ принципі бойынша аралас форматта оқуын бастайды. Сыныптағылар саны 15 адамнан аспайды. Офлайн сабақ кестесіне инвариантты компонент пәндері кіреді: орыс тілі мен әдебиеті, қазақ тілі мен әдебиеті, шет тілі, алгебра, геометрия, физика, химия, биология, география, Қазақстан тарихы және дүниежүзі тарих. Бұл пәндердің 70%-ы. Қалған 30% пәндер қашықтан оқу форматында өтеді. Бұл информатика, өзін-өзі тану, дене шынықтыру, құқық негіздері, алғашқы әскери дайындық. Сондай-ақ ауыспалы компонент тақырыптары кестеге сәйкес асинхронды түрде өткізіледі», – деді брифинг барысында Нұр-Сұлтан қаласы білім басқармасының басшысы Шолпан Қадырова.
Биылғы оқу жылында астанада 9-сыныпта 13 215, 11-сыныпта 7567 бала оқиды.
«Мектептерде икемді кестелер болады. Сабақтар арасындағы үзіліс әр сыныпқа әртүрлі уақытта болып, әлеуметтік алшақтық үшін ауысым көбейтіледі. Бір сабақ уақыты 5 минуттық үзіліспен 30 минуттан аспайды», – деп түсіндірді спикер.
Білім беруді жаңғырту орталығы үшінші тоқсанда қаланың барлық мектебі басшылыққа алатын әдістемелік ұсыныстар, кесте жасады. Сабақ кестесін құру кезінде жоғары сынып оқушыларының жас ерекшеліктері, олардың қабілеттері әрі қажеттіліктері, бұған қоса 11-сынып оқушыларының жаңартылған білім беру мазмұнына көшуі және кіріктірілген сабақтарды өткізу мүмкіндігі ескерілді.
«Сонымен бірге ата-аналар әрі мұғалімдер келісімімен мектеп оқушыларының білім алуда жоғалтқан уақытының орнын толтыру мен сабақтан тыс кезде қорытынды аттестаттауға дайындалу мақсатында 5 адамнан аспайтын топтарда жеке консультациялар ұйымдастырылады. Сабақ уақыты кестеге сәйкес. Бұл шешім ата-аналар және мұғалімдер пікірін ескере отырып қабылданды. Өздеріңіз білетіндей, бітіруші сыныптар оқу жылының соңында қорытынды аттестаттаудан әрі ҰБТ-дан өтеді. Бұл мәселеге ерекше назар аудару керек», – деді Ш. Қадырова.
Айта кетейік, мектептердегі барлық іс-шара мен сабақтар санитарлық нормаларға сәйкес өткізіледі.
