№20 автобус бағытында кез келген екінші деңгейлі банк картасымен жолақы төлеудің пилоттық жобасы іске қосылды, деп хабарлайды DalaInform CTS көлік компаниясына сілтеме жасап.
Бұл төлем жүйесі тест режимінде жүзеге асады және шамамен бір айға созылады.
VISA, Mastercard карталары, NFC жүйесімен жабдықталған смартфон арқылы төлем жасауға болады. Транзакция үшін оларды валидатордың жанында орналасқан арнайы терминалға тигізу жеткілікті.
Қажет болған жағдайда жолаушы электронды билетті smsbus.kz сайтынан ала алады. Валидатор экранында мемлекеттік әрі орыс тілдерінде электрондық билетті алуға сілтемелер көрсетілген.
Банк картасымен төлеу кезінде жол жүру құны 90 теңгені құрайды.
Қазір жолаушылар арасында жол ақысын банк картасымен байланысты мобильді қосымшалар арқылы төлеудің балама әдістерін қолданудың өсімі байқалады. Бұл үлес жалпы айналымның 20% құрайды.
Болашақта бұл үрдіс CTS компаниясына банк картасынан тікелей төлем қабылдау мүмкіндігімен онлайн режимге көшу міндетін қояды.
CTS осы мақсатты жүзеге асыру үшін банк картасымен төлем қабылдау бойынша екі пилоттық жобаны қолға алды. Олар толыққанды қосу алдында барлық бағытта әртүрлі валидатор мен жүйені тексеруге мүмкіндік береді.
