Өткен тәулікте коронавирус инфекциясының зертханалық расталған 47 жағдайы анықталды. Осыған байланысты астана тұрғындарына демалысты үйде өткізуге және адам көп жиналатын орындарға бармауға кеңес берілді, деп хабарлайды DalaInform бас қала әкімдігіне сілтеме жасап.
«Қаладағы жағдай күрделенбеуі, қатаң шектеулерді қабылдамау үшін, осы күндері үйде болу, адам көп жиналатын орындарға бармау әрі үлкен жиындар өткізбеу керек. Жағдай тұрақтанбаса шектеу шаралары күшейтіледі. Барлық тұрғындарды санитарлық нормаларды, карантин режимін қатаң сақтауға шақырамыз. Карантин тәртібін бұзғаны үшін жауапкершілік қарастырылған», – деді елорданың бас мемлекеттік санитар дәрігері Жанна Пірәлиева.
Сауда орталығына, дүкендерге барған кезде маска тағу тәртібі мен арақашықтықты қатаң сақтау, санитайзер қолдану қажет.
«Қарапайым нормаларды сақтау арқылы өзіміздің, жақындарымыздың денсаулығын сақтаймыз. Коронавирус жасқа қарамайды, динамика көрсеткендей, науқастар арасында созылмалы аурулары жоқ жастар да бар. Емделіп шыққандар да вирустан толық айықпайды. Инфекция өкпеге ғана емес, бүйрекке, бауырға, жүрекке және миға да әсер етуі мүмкін. Сонымен қатар өкпеде тіндік фиброз түріндегі ошақтар пайда болады. Өзіңізді әрі жақындарыңызды қорғау үшін сіз қауіпсіздік шараларын сақтауыңыз керек», – дейді Пірәлиева.
Бұдан бұрын хабарланғандай, 10 желтоқсаннан бастап Нұр-Сұлтан ковид таралуы бойынша «қызыл аймаққа» кірді. Ауру барлық жастағы тұрғындар арасында анықталып жатыр.
