Ұлттық қауіпсіздік комитеті ішкі істер министрлігімен бірлесіп, қылмыстық топтардың жолын кесті, деп хабарлайды DalaInform тілшісі ҰҚК-ге сілтеме жасап.
Комитет пен министрлік «А» және «Бүркіт» арнайы бөлімшелерін тарта отырып, астана аймағында қорқытып алу, рейдерлік, қару саудасымен айналысқан «Әлібековтер», «Ибрагимовтар», «Махмұдовтар» ұйымдасқан қылмыстық топтарының аса қауіпті әрекетінің жолын кесті.
«Нұр-Сұлтан, Алматы, Ақтөбе, Қостанай қалаларындағы арнайы операция шеңберінде аталған топтардың 15 жетекшісі, белсенді мүшелері ұсталды. Олардың біреуі Ресей Федерациясында бандитизм жасап, адам өлтіргені үшін халықаралық іздеуде болған. Атыс қаруы, оқ-дәрілер, гранаталардың арсеналы алынды», – делінген ақпаратта.
Ұсталғандар Нұр-Сұлтан қаласы полиция департаментінің уақытша ұстау изоляторына қамалып, қолда бар дәлелдемелерді бекіту, қылмыстық әрекеттің өзге де эпизодтарын анықтау бойынша тергеу іс-шаралары жүргізіліп жатыр.
Карантиндік шектеулер жағдайында қылмыстық топтар өздерінің қылмыстық белсенділігін төмендетпей, экономикалық қиындыққа тап болған кәсіпкерлерді қорқыту, рейдерлікпен айналысуды жалғастырған. Бөтеннің мүлкін алып қою бойынша қылмыстардағы дөрекілік, қатыгездік көбінесе атыс қаруы мен күш қолданумен жүзеге асқан.
Осы жағдайларда ел басшылығы құзыретті органдар үшін бейбіт азаматтарға бандиттік элементтер тарапынан қауіп-қатерлерді жою, қоғамның 90-шы жылдардағы «рэкетирлікке» қарай құлдырауына жол бермеу бойынша міндеттерді басымдықтар қатарына қойып отыр. Арнайы қызметтердің, полицияның қылмыстық топтардың жоспарларын, ниеттерін анықтау және оның жолын кесу бойынша жүйелі жұмыс жалғасып келеді.
Айгүл ЕЛТАЙ
