1 және 2 сұрыпты шитті мақтаны сату бағасы келісіне 130 теңгеден жоғары боп белгіленді, деп хабарлайды DalaInform ауыл шаруашылығы министрлігіне сілтеме жасап.
Қазақстандағы мақта саласы негізінен экспортқа бағытталғандықтан, ондағы баға саясаты сыртқы нарықтағы өнімге сұраныс негізінде қалыптасады. Биыл қазақстандық мақта нарығында шетелдік компаниялардың белсенділігіне әлемдегі күрделі эпидемиологиялық жағдай мен Еуропадағы коронавирустың екінші толқынының таралуы әсер етті.
«Сату бағасын анықтау үшін ауыл шаруашылығы бірінші вице-министрі Айдарбек Сапаровтың төрағалығымен Түркістан облысы ауыл шаруашылығы басқармасы, Қазақстан мақта қауымдастығы және мақта өңдеу зауыттары басшыларының қатысуымен кеңес өтті», – делінген ақпаратта.
Кеңес қорытындысы бойынша Қазақстан мақта қауымдастығы 9 қазанда мақта дайындаушылар мен қайта өңдеушілер жиналысын өткізді. Онда өнімдерді сату бағасы – 1 және 2-ші сұрыпты мақтаның 1 келісі үшін кемінде 130 теңге боп бекітілді.
