ҚР Экология, геология және табиғи ресурстар министрлігі «Жасыл Қазақстан» ұлттық жобасын әзірлеуде деп хабарлайды Dalainform тілшісі.
Бұл туралы бүгінгі Үкімет отырысында министрлік басшысы Мағзұм Мырзағалиев мәлімдеді.
Оның айтуынша, Мемлекет Басшысы Қасым-Жомарт Тоқаевтың тапсырмасы аясында әзірленіп жатқан ұлттық жобаны іске асыру, ауаның ластану деңгейі жоғары 10 қаладағы жағдайды жақсартуға мүмкіндік береді.
«Жасыл Қазақстан» ұлттық жобасы 7 негізгі бөлімнен тұрады: су нысандарын сауықтыру, ауаның ластану деңгейін төмендету, қалдықтарды басқару, биоалуантүрлілікті сақтау, елді көгалдандыру, энергия тиімділігі, экоқұрылым және экологиялық мәдениетті арттыру. Бұл Теміртау, Нұр-Сұлтан, Алматы, Ақтөбе, Атырау, Өскемен, Қарағанды, Балқаш, Жезқазған және Шымкент қалаларында экологиялық жағдайды жақсартуға ықпал етеді»,- дейді министр.
Жалпы елімізде 2025 жылға қарай ағын суларды төгу көлемін төмендетуге қол жеткізу, қалдықтарды өңдеу үлесін ағымдағы 18%-дан 35%-ға дейін арттыру жоспарлануда.
