Павлодар облысының жедел қызметкерлері Екібастұзда төрт күн бұрын жоғалған кәмелетке толмағандарды ШҚО-дан тапты, деп хабарлайды DalaInform тілшісі құқық қорғаушылар сайтына сілтеме жасап.
2020 жылғы 6 қыркүйекте ата-аналар Екібастұз тәртіп сақшыларына балаларды іздеу туралы өтініш білдірді.
«Бұл күні сағат 20.00 шамасында 2007 жылы туған Екібастұз қаласының ЖОББМ оқушысы және 2002 жылы туған кәмелетке толмаған колледж оқушысы үйден кеткені белгілі болды», – деді полиция департаменті криминалдық полиция басқармасы бастығының орынбасары Арман Сәбиев.
Жедел қызметкерлер дереу бағдар жасап, аумақтық бөлімшелерге жіберді. Жасөспірімдерді іздестірумен полицейлер, «Vita» және «Легион 14» ЕІЖ еріктілері, бейжай қарамайтын азаматтар да айналысты. Бағдарлар барлық жерге жабыстырылды.
«Жедел іздестіру іс-шараларын жүргізу кезінде бірнеше нұсқа тексерілді. Іздестіру нәтижесінде Павлодар облысының құқық қорғаушылары Шығыс Қазақстан облысының полицейлерімен бірлесіп, жеткіншектердің екеуін де Өскемен қаласындағы қонақ үйлердің бірінен тапты», – деп түсіндірді Сәбиев Polisia.kz сайтына.
Кәмелетке толмағандар заңды өкілдеріне беріледі. Тәртіп сақшылары заңды өкілдердің жауапкершілігі туралы мәселені қарастыруда. Айта кету керек, биылғы жылдың басынан бері Павлодар облысының полициясында хабар-ошарсыз кеткен балаларға қатысты 75 өтініш тіркеліп, олардың барлығы анықталып, үйлеріне қайтарылды.
Айгүл ЕЛТАЙ
