Қазақстан мұсылмандары діни басқармасының шариғат және пәтуа бөлімі ер кісінің жыныс мүшесін әйелдікіне ауыстыруы немесе керісінше істеуі харам екенін жазады деп хабарлайды Dalainform тілшісі.
Дін мамандары жыныстық мүшені ауыстыру – Жаратушының жаратылысын өзгерткенмен тең екенін айтады.
Дүниежүзілік мұсылман лигасына қарасты ислами фиқһ академиясы өзінің он бірінші отырысында осы мәселе жөнінде: «Аталық жыныс мүшелері толық жетілген ер кісінің немесе аналық жыныс мүшелері толық жетілген әйелдің жыныс мүшесін қарсы тараптың жыныс мүшесіне ауыстыруы – харам іс. Бұл үлкен күнәлардың қатарына жатады. Мұндай сорақы іске қадам басқан адам жазаға лайық болады. Өйткені бұл іс Алланың жаратқан жаратылысын өзгерткенмен тең», – деген шешім шығарған.
Еске сала кетсек, Қазақстанда денсаулық сақтау министрі Алексей Цой адамның жынысын ауыстыруына байланысты медициналық куәландыру ережесі көрсетілген бұйрыққа қол қойды. Ол үшін 21 жасқа толған азаматтың ақыл-есі дұрыс болуы керек және арнайы комиссия құрылады.
