Алматыда «Digital Almaty 2021: цифрлық қайта жаңғыру: жаңа жағдайға серпіліс» форумы өтіп жатыр, деп хабарлайды DalaInform үкіметке сілтеме жасап.
Бұл – пандемия басталғалы елімізде офлайн режимде өтіп жатқан алғашқы халықаралық жиын. Форум Қасым-Жомарт Тоқаев пен дүниежүзілік экономикалық форум президенті Берге Бренденің бейне үндеулерінен басталды. Google вице-президенті Винт Серф онлайн режимде сөз сөйледі. Пленарлық сессияға Армения премьер-министрі Никол Пашинян, Беларусь премьер-министрі Роман Головченко, Қырғызстан премьер-министрі Улукбек Марипов, Ресей премьер-министрі Михаил Мишустин, Өзбекстан премьер-министрі Абдулла Арипов, ЕЭК алқасының төрағасы Михаил Мясникович, Kaspi.kz негізін қалаушылардың бірі Михаил Ломтадзе және ERG директорлар кеңесінің төрағасы Александр Машкевич қатысты.
Жиында Мамин 2020 жылы Қазақстан электрондық үкіметті дамыту деңгейі бойынша БҰҰ рейтингінде 10 позицияға көтеріліп, 193 ел арасында 29-шы орынға ие болғанын айтты. Үкімет басшысы цифрлық инфрақұрылымды дамыту аясында алдағы 5 жыл ішінде Қазақстанның облыс орталықтары әрі республикалық маңызы бар қалаларының бәрі 5G жабынымен қамтамасыз етілетінін атап өтті.
Жиынға қатысушылар еліміздің мемлекеттік қызметтер көрсету, фискалдық деректер сараптау, сондай-ақ қаржы-банк пен телекоммуникация салаларындағы цифрлық жобалар көрмесімен танысты.
